ᐱᓇᓱᐊᕐᓂᖅᓴᐅᔪᒪᓂᕐᒧᑦ ᐅᖃᐅᓯᒃᓴᓕᐊᕆᓯᒪᔭᕗᑦ
ᓄᓇᓕᒋᔭᐅᔪᑦ ᐊᑐᖅᑎᑦᑎᓂᐊᖅᑐᑦ ᓴᐳᓐᓂᐊᕈᑎᒃᓴᐅᔪᓐᓇᖅᑐᓂᒃ ᐊᒻᒪᓗ ᐱᓂᕐᓗᒌᒃᑯᑕᐅᒋᐊᕈᓐᓇᖅᑐᓂᒃ ᐃᖕᒥᓂᕈᑕᐅᖏᓂᖅᓴᐅᓕᕈᓐᓇᖅᑐᓂᒃ ᓄᓇᕗᒻᒥ, ᑕᒫᓂ ᖁᓖᖅᑕᖅᓯᒪᑎᒋᔪᒥᒃ ᐊᒥᓲᓂᖅᓴᐅᓂᖃᕐᒪᑕ ᑲᓇᑕᒥ ᐊᑐᖅᑕᐅᕙᖕᓂᖏᓐᓂᒃ, ᐊᒥᓱᕈᕆᐊᖅᓯᔪᒪᓪᓗᑎᒃ ᐱᑕᖃᕈᓐᓇᕐᓂᖏᓐᓂᒃ ᐊᑐᖅᑕᐅᔪᓐᓇᕐᓂᖏᓐᓂᓗ ᐱᓕᕆᔨᐅᖃᑎᒌᓕᕈᓐᓇᖅᑐᑦ ᐃᑲᔪᖃᑦᑕᐅᑎᓗᒃ, ᐃᓕᓐᓂᐊᕈᑎᒃᓴᖃᕐᓗᑎᑦ ᐊᒻᒪᓗ ᓴᕿᑎᕆᖃᑦᑕᕈᓐᓇᕐᓗᑎᒃ ᐅᐸᒃᓯᒪᔪᓐᓇᖅᑕᖏᓐᓂᒃ ᐱᐅᓯᕚᓪᓕᕈᑕᐅᔪᓐᓇᖅᑐᓂᒃ ᐃᓱᒪᒃᑯᑦ ᖃᓄᐃᖏᓐᓂᖅᓴᐅᔪᓐᓇᕐᓂᕐᒧᑦ ᑕᒪᐃᓐᓂ ᓄᓇᕗᒻᒥᐅᓕᒫᓂ
ᑖᒃᑯᐊ ᑲᑎᓐᖓᓂᖅ: ᓄᓇᓖᑦ, ᐊᑕᖃᑕᐅᓗᑎᒃ, ᖃᕆᑕ ᐅᔭᒃᑯᓪᓗ ᐃᓚᒋᔭᐅᔪᓐᓇᕐᓂᖏᑦ ᐃᓅᓯᕐᒥᒃ ᐱᐅᓯᕚᓪᓕᕈᑕᐅᔪᓐᓇᕐᓂᕐᒧᑦ ᓄᓇᕗᒻᒥ ᑐᒃᓯᕋᐅᑏᑦ ᖃᐃᑕᐅᕗᑦ ᓄᓇᕗᒻᒥ ᑲᑐᔾᔨᖃᑎᒌᖏᓐᓂᒃ ᕼᐊᒻᒪᓚᒃᑯᑦ ᓇᓄᓕᐸᐅᔭᐃᓪᓗ ᒐᕙᒪᖏᓐᓂᒃ, ᐃᓴᒃᓯᒪᓂᖅ ᐃᓅᓯᕐᒥᒃ ᑲᑎᒪᔨᓂᒃ, ᖃᐅᔨᒋᐊᖅᑎᑦ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕐᕕᖓᓂᒃ ᐊᒻᒪᓗ ᐱᓐᖑᐊᒃᑯᑦ ᑲᑐᔾᔨᖃᑎᒌᖏᓐᓂᒃ, ᑭᒡᒐᖅᑐᐃᓪᓗᑎᒃ 25-ᓂᒃ ᓄᓇᓕᖕᓂ ᓄᓇᕗᒻᒥ. ᐅᖃᐅᓯᐅᓯᒪᔪᓂᒃ ᒪᓕᒃᓱᑎᒃ ᑕᐃᒃᑯᓂᖓ ᐱᓇᓱᐊᕐᓂᖅᓴᐅᔪᒪᓂᕐᒧᑦ ᐅᖃᐅᓯᒃᓴᓕᐊᕆᓯᒪᔭᑎᓐᓂ, ᑐᒃᓯᕋᐅᑎᓕᐅᖅᑐᒍᑦ ᕿᓂᖅᑐᓂᒃ ᓴᐳᓐᓂᐊᕈᑕᐅᒋᐊᒃᑲᓐᓂᕈᓐᓇᖅᑐᓂᒃ ᐃᖕᒥᓃᖅᑎᑦᑎᑕᐃᓕᒪᔪᒪᓂᕐᒧᑦ ᐱᑕᖃᕐᓂᖅᓴᐅᓗᑎᒃ ᐊᑐᖅᑕᐅᔪᓐᓇᖅᑐᑦ ᐊᑕᐃᓐᓇᐅᔪᓐᓇᕐᓂᖏᓪᓄᓗ ᐃᓅᖏᓐᓇᖁᔨᓂᕐᒥᒃ ᐱᕚᓪᓕᑎᑦᑎᓂᕐᒧᑦ ᖃᓄᐃᓕᐅᕈᑎᒃᓴᐃᑦ, ᐊᑐᒐᒃᓴᖃᕐᓗᑎᒃ ᐊᒻᒪᓗ ᐃᑲᔪᖅᑎᖃᕐᓗᑎᒃ ᐱᓕᕆᔨᐅᖃᑎᒌᒎᓐᓇᖅᑐᓂᒃ, ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ ᐱᒋᐊᖅᑎᑦᑎᓗᑎᒃ ᐊᒻᒪᓗ ᓴᕿᑎᕆᖃᑦᑕᕈᓐᓇᕐᓗᑎᒃ ᐅᐸᒃᓯᒪᔪᓐᓇᖅᑕᖏᓐᓂ ᑕᒪᐃᓐᓂ ᐱᑕᖃᕐᓗᑎᒃ ᓄᓇᕗᒻᒥ, ᑕᒪᒃᑯᓇᓂ ᖃᕆᑕᐅᔭᒃᑯᑦ ᐊᒻᒪᓗ ᓴᓇᕐᕈᑎᒃᓴᐅᕙᓕᖅᑐᓂᒃ ᐊᑐᕐᓗᑎᒃ.
ᑕᒪᒃᑯᐊ ᐱᒋᐊᖅᑎᑕᐅᓇᔭᖅᑐᑦ ᓴᕿᑦᑎᕕᐅᓇᔭᖅᑐᑦ ᑕᒪᐃᓐᓂᒃ ᐱᖁᑎᓂᒃ ᐊᒻᒪᓗ ᖃᕆᑕᐅᔭᒃᑯᑦ ᐃᓂᒃᓴᖃᕐᕕᐅᓂᐊᖅᑐᓂᒃ ᐱᕚᓪᓕᕈᑕᐅᓕᕈᓐᓇᖅᑐᓂᒃ ᓄᓇᕗᒻᒥᐅᓄᑦ ᐊᑦᑕᑕᖅᓯᒪᔪᓐᓇᕐᓂᖅ ᐊᒻᒪᓗ ᑕᐅᖅᓰᖃᑦᑕᐅᑎᔪᓐᓇᕐᓂᕐᖅ ᖃᐅᔨᒪᔭᖏᓐᓂᒃ ᐊᓯᒥᓄᑦ, ᐃᓕᓐᓂᐊᕐᓗᑎᒃ ᐃᓕᖅᑯᓯᑐᖃᕐᒥᓂᒃ ᐃᒃᐱᒍᓱᑦᑎᐊᕐᓂᖅᓴᐅᓗᑎᒃ ᐃᓕᓐᓂᐊᕈᑎᒃᓴᖃᕐᓗᑎᒃ ᐊᒻᒪᓗ ᐃᓕᓐᓂᐊᕐᕕᐅᑉ ᓯᓚᑖᒍᑦ ᖃᓄᐃᓕᐅᖃᑕᐅᔪᓐᓇᕐᓗᑎᒃ, ᐃᓱᒪᒋᔭᖏᓐᓂᒡᓗ ᓴᓇᐅᒐᓕᐅᕈᓐᓇᕐᓗᑎᒃ ᐊᒻᒪᓗ ᐅᓗᕆᐊᓇᖅᑐᖃᖏᑦᑐᒥᒃ ᐊᕙᑎᖃᖅᑎᑕᐅᓗᑎᒃ ᐃᓱᒪᑯᑦ ᖃᓄᐃᑦᑐᓃᕈᑕᐅᓕᕈᓐᓇᖅᑐᓂᒃ. ᐃᓱᒪᒋᔭᐅᓂᖅᐹᖑᓂᐊᖅᑐᑦ ᓄᓇᓕᓪᓗ ᐃᓄᐃᓪᓗ ᓴᖏᓂᖃᕐᕕᒋᔭᖏᑦ ᐊᔪᖏᓐᓂᖏᓪᓗ ᐊᑐᕐᓂᐊᕐᒪᑕ ᐱᑕᖃᐃᓐᓇᕈᓐᓇᕐᓂᐊᖅᑐᓂᒃ ᐃᓂᒃᓴᖃᕐᕕᒃᓴᓂᒃ, ᐊᑐᖅᑕᐅᓂᖅᐹᖑᔪᓐᓇᕐᓂᐊᖅᑐᓂᒃ ᖃᕆᑕᐅᔭᒃᑯᑦ ᐊᒻᒪᓗ STEAM-ᖑᓂᕋᖅᑕᐅᔪᓂᒃ ᑐᖓᕕᖃᖅᑐᓂᒃ ᐱᓕᕆᐊᖑᔪᓂᒃ, ᒪᓕᖕᓂᐊᖅᑐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᓱᕐᓗ ᐱᓕᕆᖃᑎᒌᑦᑎᐊᕈᓐᓇᕐᓂᕐᒥᒃ, ᐊᑲᐅᖏᓕᐅᕈᑎᖃᖅᑐᓂᒃ ᖃᓄᖅᑑᕈᑎᖃᕈᓐᓇᕐᓂᕐᒥᒃ ᐊᒻᒪᓗ ᖃᐅᔨᕙᓪᓕᐊᔭᖏᓐᓂᒃ ᑕᐅᖅᓰᖃᑦᑕᐅᑎᔪᓐᓇᕐᓂᖏᓐ; ᑐᕌᒐᖃᕐᓗᑎᒃ ᓴᐳᓐᓂᐊᕈᑎᒃᓴᖃᕐᓂᖅᓴᐅᖁᔨᓂᖅ ᐃᑲᔪᕐᓗᑎᒡᓗ ᐃᓅᖃᑎᒌᒃᑐᓂᒃ ᓇᓪᓕᖁᐊᕇᖕᓂᖅᓴᐅᓕᕈᓇᕐᓂᖏᓐᓄᑦ ᐱᔾᔪᑎᖃᖅᑐᓂᒃ ᖃᕆᑕᐅᔭᒃᑯᕈᑎᒃᓴᖃᑦᑎᐊᓲᖑᖏᓐᓂᖏᑦ ᐃᓚᖏᑦ ᐊᕕᒃᑐᖅᓯᒪᓂᖏᓐᓂᒃ ᓄᓇᕗᒻᒥ.
ᓴᕿᑎᑦᑎᔾᔪᑕᐅᔪᑦ ᐃᓂᒃᓴᓂᒃᓯᒪᓂᖅ ᓇᓂᑐᐃᓐᓇᖅ ᓄᓇᕗᒻᒥ ᐱᔾᔪᑎᖃᖅᐳᖅ ᐱᔪᓐᓇᖅᓯᖁᔨᓂᖅ ᓴᖏᓂᖃᕐᕕᐅᓕᕐᓗᑎᒃ ᒪᒃᑯᒃᑐᓄᑦ ᓯᕗᓂᒃᓴᒥᓂᒃ ᖁᕕᐊᓇᕈᓐᓇᕐᓂᖏᓐᓂᒃ ᓂᕆᐅᒍᓐᓇᕐᓂᖏᓐᓂᒃ, ᐱᔪᓐᓇᖅᓯᓯᒪᓗᑎᒃ ᐊᓂᒎᑎᖃᑦᑕᕈᓐᓇᕐᓂᖅ ᐊᒃᓱᕈᕐᓇᖅᑐᒃᑰᕐᕕᒋᓯᒪᔭᒥᓂᒃ ᐊᒻᒪᓗ ᓴᓇᕐᕈᑎᒃᓴᖃᖅᑐᑎᑐᑦ ᐊᑐᒐᒃᓴᖃᕐᓗᑎᒃ, ᐃᑲᔪᖅᑕᐅᖃᑦᑕᕐᓗᑎᒃ ᐱᑦᑎᐊᖃᑦᑕᖅᑐᓂᒃ ᐃᓅᖃᑎᖃᕐᓂᕐᒥᓂᒃ, ᒪᒃᑯᒃᑐᑦ ᐱᕙᓪᓕᐊᑎᑦᑎᔪᓐᓇᕐᓂᐊᕐᒪᑕ ᐃᒃᐱᓐᓂᐊᔪᓐᓇᕐᓂᕐᒥᒃ ᐃᓅᖃᑕᐅᑦᑎᐊᕈᓐᓇᕐᓂᕐᒥᓂᒃ, ᐱᔾᔪᑎᒃᓴᖃᑦᑎᐊᕐᓂᕐᒥᓄᑦ ᐃᓅᓂᕐᒥᓄᑦ, ᑐᑭᖃᕐᓂᖓᓄᑦ ᐊᒻᒪᓗ ᓂᕆᐅᖕᓂᖃᓕᕈᓐᓇᕐᓂᖏᓐᓂᒃ ᐃᓚᐅᖃᑦᑕᕐᓗᑎᒃ ᖃᓄᐃᓕᐅᕐᕕᐅᔪᓐᓇᖅᑐᓂᒃ ᐱᔭᒃᓴᖃᕐᓗᑎᒃ. ᑕᒪᒃᑯᐊ ᐱᕙᓪᓕᐊᑎᑕᐅᒍᑎᒃ ᐱᑕᖃᓕᕈᑕᐅᔪᓐᓇᖅᐳᑦ ᐅᓗᕆᐊᓇᖅᑐᖃᖏᑦᑐᓂᒃ, ᐱᕈᖅᔭᓴᐅᑦᑎᐊᕈᓐᓇᕐᓂᖏᓐᓂᒃ, ᑐᖓᓱᒃᑎᑕᐅᑕᕐᓗᑎ,ᒃ ᐃᓄᖃᑎᒋᒃᑐᓄᑦ ᑲᑎᕕᖕᓂᒃ ᓄᓇᕗᒻᒥᐅᓄᑦ, ᐃᒪᐃᓐᓇᓕᖓᓂᐊᖅᑐᓂᒃ:
- ᐱᑕᖃᓕᖅᑎᑦᑎᓂᖅ ᐃᓱᒪᒋᔭᐅᖑᐊᕈᓇᖅᑐᓂᒃ ᐊᒻᒪᓗ ᐃᓚᐅᑎᑕᐅᔪᓐᓇᕐᓂᖏᓐᓄᑦ ᐊᑐᖅᑕᐅᔪᓐᓇᖅᑐᑦ: ᐃᓚᖃᕐᓗᑎᒃ ᐃᕿᐊᖑᐃᔭᐅᑎᒃᓴᓂᒃ, ᐃᓕᓐᓂᐊᕐᕖᑦ ᓯᓚᑖᒍᑦ ᐃᓕᓴᒐᒃᓴᓂᒃ ᐊᒻᒪᓗ ᐊᔪᕈᓐᓃᒐᒃᓴᓂᒃ (ᓯᕗᓕᐅᖅᑎᐅᓂᕐᒥᒃ, ᖃᕆᑕᐅᔭᓕᕆᓂᕐᒥᒃ, ᐃᓅᖃᑎᒌᒃᑐᓂᒃ), ᓴᓇᐅᒐᓕᕆᓂᕐᒥᒃ/ᓴᕿᑎᑦᑎᖃᑦᑕᕈᓐᓇᕐᓂᖏᓐᓂᒃ ᐃᖕᒥᓂᖔᖅᑐᓂᒃ (ᖃᓄᐃᓕᐅᕐᓂᖏᓐᓂᒃ, ᑕᑯᒃᔭᒃᓴᓂᒃ, ᑐᓴᕐᓈᒐᒃᓴᓂᒃ), ᐱᐅᓯᑐᖃᕐᒥᒍᑦ ᐅᖃᐅᓯᕐᒥᒍᓪᓗ ᐱᓕᕆᓂᖏᓐᓄᒃ, ᑕᐃᒪᐃᒃᑯᐊᕐᒥᓂᒃ ᐃᓱᒻᒥᖅᓴᐃᔨᐅᖃᑕᐅᓂᕐᒥᒃ, ᐃᓐᓇᑐᖃᕐᓂᒃ ᐃᓱᒻᒥᖅᓴᐃᔨᖃᕐᓂᖏᓐᓂᒃ ᐊᒻᒪᓗ ᐊᔪᕈᓐᓃᖅᓴᐃᔨᖃᕐᓗᑎᒃ ᐊᔭᐅᖅᑎᐅᔪᓐᓇᖅᑐᓂᒃ ᐊᔪᖏᓐᓂᖃᕐᓂᖏᓐᓂᒃ.
- ᓇᓕᒧᒌᖕᓂᖅᓴᐅᓗᑎᒃ ᖃᕆᑕᐅᔭᒃᑯᑦ ᐅᖓᓯᒃᑐᒃᑯᕈᑕᐅᕙᒃᑐᑦ ᐊᑕᑕᕐᕕᖏᑦ ᒪᒃᑯᒃᑐᑦ ᐱᕕᒃᓴᖃᕐᓂᖅᓴᐅᓗᑎᒃ ᐊᑦᑕᑕᖅᓯᒪᖃᑕᐅᔪᓐᓇᕐᓂᖅ ᓄᓇᓕᖕᓂ ᓇᓂᑐᐃᓐᓇᕐᓗ ᑕᒪᐃᓐᓂᒃ 25-ᖑᔪᓂ ᕼᐊᒻᒪᒪᑦᑯᓐᓂᒃ, ᑐᓂᓯᖃᑦᑕᐅᑎᔪᓐᓇᕐᓗᑎᒃ ᐃᖕᒥᓄᑦ ᐊᑐᕈᓐᓇᕐᓗᑎᒃ ᑕᑯᒃᓴᐅᑎᑦᑐᒪᔭᖏᓐᓂᒃ ᖃᕆᑕᐅᔭᒃᑯᑦ ᐊᒻᒪᓗ ᓴᓇᕐᕈᑕᐅᕙᓕᖅᑐᒃᑯᑦ ᖃᐅᔨᒪᓕᕈᑎᒃ ᖃᓄᖅ ᐊᑐᖅᑕᐅᓲᖑᖕᒪᖔᑕ ᖃᕆᑕᐅᔭᒃᑯᑦ ᑐᓴᐅᒪᖃᑦᑕᐅᑎᔾᔪᑏᑦ.
- ᐊᑐᓕᖅᑎᑕᐅᓗᑎᒃ ᓄᓇᓕᖕᓂ ᐃᑲᔪᖅᑎᒃᓴᐃᑦ, ᐃᓚᖃᕐᓗᑎᒡᓗ ᖃᓄᐃᑐᓐᓃᕈᓐᓇᕐᓂᕐᒧᑦ ᐃᑲᔫᑎᒃᓴᐃᑦ, ᒪᒃᑯᒃᑐᑦ ᐊᑐᕈᓐᓇᖅᓯᓗᑎᒃ ᐃᓄᖃᑎᒌᒃᑐᓄᑦ/ᓄᓇᓕᖕᓄᑦ ᐱᔨᑦᑎᕋᐅᑎᓂᒃ ᑐᖓᕕᖃᕋᓱᐊᖅᑐᓂᒃ ‘ᐃᓗᐃᒃᑲᐅᔪᓂᒃ ᐃᓅᑎᑦᑎᓇᓱᐊᖁᑎᓂᒃ’ ᐃᓂᒃᓴᖃᕐᕕᐅᑎᑕᐅᕙᖕᓂᐊᖅᑐᓂᒃ.
ᑖᒃᑯᓇᓃᑦᑐᑦ ᐃᔾᔪᐊᒐᒃᓴᐃᑦ ᐊᑐᖅᑕᐅᔪᓐᓇᖅᑐᑦ ᐃᓂᒃᓴᓂᒃᓯᒪᓂᕐᒧᑦ ᓄᓇᕗᒻᒥ ᓇᓄᑐᐃᓐᓇᖅ ᑕᐅᑐᒐᖃᖅᐳᑦ ᐊᑐᐃᓐᓇᕈᐃᓂᕐᒥᒃ ᐊᑕᖃᑕᐅᔪᓐᓇᕐᓂᖏᓐᓂᒃ ᐊᒻᒪᓗ ᐊᑐᕈᓐᓇᕐᓂᖏᓐᓂᒃ ᖃᕆᑕᐅᔭᒃᑯᑦ ᓴᓴᕐᕈᑎᓂᒃ ᐃᓕᓐᓂᐊᕈᑎᒃᓴᓂᒡᓗ ᐱᕕᒃᓴᖃᕈᑕᐅᓕᕈᓐᓇᖅᑐᓂᒃ ᐅᑭᐅᖃᑎᒌᖏᑦᑎᐊᖅᑐᓂᒃ ᖃᐅᔨᒪᖃᑦᑕᐅᑎᓂᖏᓐᓂᒃ ᑐᓂᓯᖃᑦᑕᐅᑎᔪᓐᓇᕐᓂᖅ ᐊᒻᒪᓗ ᐅᖃᐅᓯᑐᖃᕐᓄᑦ ᓴᖏᓂᖅᑖᕈᑕᐅᑲᓐᓂᕋᓱᐊᕐᓂᐊᖅᑐᓂᒃ, ᐊᖅᑯᑎᒋᔭᐅᔪᓐᓇᕐᒪᑕ ᐃᓱᒪᒃᑯᑦ ᖃᓄᐃᑦᑐᖏᑦᑐᓐᓇᕐᓂᕐᒧᑦ ᒪᒃᑯᒃᑐᑦ ᑐᖓᕕᖃᑦᑎᐊᕈᓐᓇᕐᑎᓗᒃ ᐃᓄᖕᓄᑦ ᐱᒻᒪᕆᐅᑎᑕᐅᖃᑦᑕᐃᓐᓇᖅᑐᓂᒃ. ᐃᓗᓕᖏᓐᓂ ᐊᕕᒃᑐᖅᓯᒪᓂᖏᓐᓂ 1 ᑐᒃᓯᕋᐅᑎᓂᒃ ᑖᒃᑯᓇᓂ, ᓇᓗᓇᐃᔭᖅᑕᐅᕗᑦ ᓴᕿᑎᑕᐅᓯᓚᑦ ᐊᒻᒪ ᐊᑐᒐᒃᓴᐃᑦ ᑕᐅᑐᒐᕆᔭᑎᓐᓄᑦ; ᐊᒻᒪᓗ ᐱᔾᔪᑕᐅᓂᖏᓐᓂᒃ ᐊᓯᔾᔨᖅᑕᐅᓕᓚᐅᕐᓂᖏᓐᓂᒃ ᑭᖑᓪᓕᖅᐸᓂᒃ ᐅᖃᐅᓯᒃᓴᓕᐊᕆᓯᒪᓚᐅᖅᑕᑦᑎᓐᓂᒃ. ᐃᓗᓕᖏᓐᓂᓗ ᐊᕕᒃᑐᖅᓯᒪᓂᖏᓐᓂ 2 ᓇᓗᓇᐃᔭᖅᑕᐅᓯᒪᕗᑦ ᐊᐅᓚᑦᑕᐅᓂᖏᓐᓄᑦ ᐋᕿᐅᒪᔭᐅᓂᐊᖅᑐᑦ ᑎᑭᐅᒪᓗᑕᐅᕙᓪᓕᐊᓂᐊᖅᑐᑦ ᑕᒪᒃᑯᓂᖓ ᐱᒋᐊᖅᑎᑕᐅᔪᒪᓂᒃ ᓴᕿᐅᒪᓕᕐᓗᑎᒃ. ᐊᕕᒃᑐᖅᓯᒪᓂᖏᓐᓂ 3 ᐅᖃᐅᓯᐅᕗᑦ ᑐᕌᒐᕆᔭᐅᓂᖏᓐᓄᑦ ᓴᕿᑎᑕᐅᔪᒪᓂᐊᖅᑐᑦ ᐱᑕᖃᓕᕐᓗᑎᒃ ᓴᕿᐅᒪᓕᕐᓗᑎᒃ, ᐃᓕᑕᕆᔭᐅᓗᑎᒃ ᐃᓕᐅᖃᐃᕕᐅᓂᖏᓐᓂᒃ ᐊᒻᒪᓗ ᐱᓕᕆᐊᖑᓂᐊᖅᑐᓂᒃ ᑐᑭᓕᐅᕈᑕᐅᓂᕐᒧᑦ ᒪᓕᒐᒃᓴᐃᑦ/ᐃᔾᔪᐊᒐᒃᓴᐃᑦ ᐊᑐᖅᑕᐅᔪᓐᓇᖅᑐᓄᑦ, ᑕᑯᒃᓴᐅᑎᑦᑎᖕᒪᑕ ᐆᒃᑐᕋᐅᑕᐅᕙᒃᑐᓂᒃ ᖃᓗᓈᑎᑐᑦ KPI-ᓂᒃ ᖃᕆᑕᐅᔭᒃᑯᑦ ᐊᑐᖅᑕᐅᕙᒃᑐᓂᒃ ᐱᕙᓪᓕᐊᓂᖏᓐᓂᒃ ᐊᒻᒪᓗ ᑕᑯᔭᒃᓴᖃᖅᓱᑎᒃ ᖃᓄᐃᑦᑐᓂᒃ ᓴᕿᑦᑎᓗᑕᐅᓂᐊᕐᒪᖔᑕ ᐱᑕᖃᓕᕐᓂᐊᖅᑐᓂᒃ ᐊᑐᓂ ᐱᓕᕆᐊᖑᓂᖏᓐᓂᒃ. ᐃᓗᓕᖏᓐᓂ ᐊᕕᒃᑐᖅᓯᒪᓂᖏᓐᓂ 4 ᓇᓗᓇᐃᔭᐃᓯᒪᔪᒍᑦ ᖃᓄᖅ ᐱᒋᐊᖅᑎᑕᐅᔪᒪᔪᑦ ᐊᑐᓕᖅᑎᑕᐅᓇᔭᕐᒪᖔᑕ ᐊᒻᒪᓗ ᐊᐅᓚᑕᐅᓗᑎᒃ, ᐊᒻᒪᓗ ᐃᓗᓕᖃᖅᓱᑎᒃ ᐅᓂᒃᑲᕈᑎᓂᒃ ᐊᒥᓱᒐᓴᖕᓂᒃ ᐱᓕᕆᐊᖑᕙᓪᓕᐊᓇᔭᖅᑐᓂᒃ, ᐱᔭᒃᓴᕆᔭᐅᕙᖕᓂᐊᖅᑐᓂᒃ ᐊᒻᒪᓗ ᐊᓯᖏᓐᓄᑦ ᐊᓯᖏᓐᓂᒃ ᐱᔭᒃᓴᕆᔭᐅᕙᖕᓂᕐᒥᔪᓂᒃ. ᐊᕕᒃᑐᖅᓯᒪᓂᖏᓐᓂ 5 ᑎᑎᕋᖅᓯᒪᔪᒍᑦ ᓇᓗᓇᐃᔭᐃᔪᓂᒃ ᐊᒻᒪᓗ ᐅᓂᒃᑳᑦᑎᐊᖅᑐᓂᒃ ᐊᔾᔨᒌᖏᓐᓂᖏᓐᓂᒃ ᖃᕆᑕᐅᔭᐃᑦ ᓴᓇᕐᕈᑎᒃᓴᐃᓪᓗ ᑐᖓᕕᐅᓂᐊᖅᑐᑦ ᑖᒃᑯᓄᖓ ᑐᒃᓯᕋᐅᓯᐊᕆᔭᑦᑎᓐᓂᒃ ᐊᑐᖅᑕᐅᓇᔭᖅᑐᓂᒃ. ᐊᕕᒃᑐᖅᓯᒪᓂᖏᓐᓂ 6 ᐃᓗᓕᖃᖅᐳᖅ ᐅᓂᒃᑲᖅᑐᓂᒃ ᖃᓄᐃᓕᖓᑎᑦᑎᔪᒪᓂᑦᑎᓐᓂᒃ ᖃᕆᑕᐅᔭᒃᑯᑦ ᐊᑐᒐᒃᓴᓂᒃ ᐊᒻᒪᓗ ᑕᒪᐅᖓᑐᐃᓐᓇᖅ ᐅᖃᐅᓯᐅᒃᑕᐃᓕᒪᓂᖏᓐᓂᒃ ᐊᑐᓪᓕᖅᑎᑕᐅᓂᖏᓐᓄᑦ ᑖᒃᑯᐊ ᐱᒋᐊᖅᑎᑕᐅᔪᒪᔪᑦ, ᐊᒻᒪᓗ ᑕᐃᒃᑯᐊ ᐊᕕᒃᑐᖅᓯᒪᓂᖏᓐᓂ 7 ᐅᖃᐅᓯᖃᖅᐳᑦ ᐃᑲᔪᕋᓱᐊᕈᒪᓂᑦᑎᓐᓂᒃ ᐃᓄᖕᓂᒃ ᐃᓚᐅᑎᑦᑎᕙᒡᓗᑕᓗ ᖃᓄᐃᓕᐅᕈᑎᒃᓴᓂᒃ ᐃᓚᒋᔭᐅᓂᐊᖅᑐᓂᒃ ᑭᖑᓪᓕᐅᖃᑕᐅᓕᕈᑦᑕ ᑭᖑᓪᓕᐅᓂᐊᖅᑐᓂᒃ ᓂᕈᐊᕐᕕᐅᓂᐊᖅᑐᓄᑦ ᐃᓚᒋᔭᐅᒍᑦᑕ. ᐃᓗᓕᖏᓐᓂ ᐊᕕᒃᑐᖅᓯᒪᓂᖏᓐᓂ 8 ᐅᖃᐅᓯᖃᖅᐳᒍᑦ ᐸᕐᓇᐅᑎᒃᓴᑦᑎᓐᓂᒃ ᐊᖑᒪᔭᕆᐊᖃᕐᓂᕐᒧᑦ ᒪᓕᒐᕆᔭᐅᔪᓂᒃ ᐊᑐᐊᒐᕆᔭᐅᔪᓂᒡᓗ ᒪᓕᒃᑕᐅᔭᕆᐊᖃᖅᑐᓂᒃ ᐱᔾᔪᑎᖃᖅᑐᓂᒃ ᐃᓄᖕᓂᒃ ᑐᑭᓯᓂᐊᕐᕕᖃᑦᑎᐊᕆᐊᖃᕐᓂᑦᑎᓂᒃ, ᐃᒃᐱᔭᐅᓗᑎᒡᓗ ᓄᓇᑖᕈᑎᑦ ᐊᒻᒪᓗ ᓄᓇᓕᖕᒥᐅᑕᓂᒃ ᐃᖃᓇᐃᔮᒃᓴᖃᖅᑎᑦᑎᔭᕆᐊᖃᕐᓂᖅ ᐃᑲᔫᑕᐅᓂᐊᖅᑐᓂᒃ. ᑭᖑᓪᓕᕐᒥᓗ, ᐊᕕᒃᑐᖅᓯᒪᓂᖏᓐᓂ 9 ᐅᖃᐅᓯᖃᖅᐳᑦ ᑭᖑᓪᓕᔭᐅᓂᑦᑎᓐᓂᒃ ᓱᓕ ᓂᕈᐊᒐᒃᓴᐅᖃᑕᐅᔪᓂ ᐆᒃᑐᖅᑐᓂ ᑐᓂᕐᕈᓯᐊᖅᑖᕋᔭᕈᑦᑕ ᐊᑐᕋᔭᖅᑐᓂᒃ ᐊᒻᒪᓗ ᐃᓗᓕᖃᖅᓱᑎᒃ ᓇᓗᓇᐃᒃᑯᑕᖃᖅᑐᓂᒃ ᖁᑦᑎᖕᓂᓕᖕᒥᒃ B-ᒥᒃ ᓇᓚᐅᑖᕈᑕᐅᔪᓂᒃ ᐊᑭᖃᕋᔭᖅᑐᔮᕐᓂᖏᓐᓂᒃ ᑮᓇᐅᔭᓂᒃ ᐊᑐᖅᑐᒃᓴᓂᒃ ᑕᓪᓕᒪᐅᓂᐊᖅᑐᓂᖅ ᐊᒡᒋᖅᑐᓂ ᐊᕐᕋᒍᓂᒃ.